Լոռու մարզի Շնող գյուղի ֆուտբոլի դաշտը  մոտ 2,5 տարի չի  ծառայում շնողնեցիներին: Այն 2010թ.-ին վերանորոգման է ենթարկվել Շնողի համայնքի բյուջեի 11,5 մլն դրամ հատկացումով:  

Թեև հատկացված պատկառելի գումարին, վերանորոգումից հետո  ֆուտբոլի դաշտը այդպես էլ ավարտուն տեսքի չի բերվել:  Չեն ցանցապատվել դաշտի դարպասները և չի բարեկարգվել դաշտի տարածքը: Ֆուտբոլի դաշտում չեն տեղադրվել նաև նստարններ: Հատկացված  գումարով  ընդամենը ցանցապատվել է դաշտի տարածքը:

Մինչ վերանորոգումը «Կարաստ» ՍՊԸ-ի  համար  դաշտը ծառայել է որպես  փայտի  պահեստարան:  Այստեղ ամբարվել է Թեղուտի հանքավայրի շահագործման համար  Թեղուտի և Շնողի անտառների հատված ծառերի փայտը:  

Ֆուտբոլի դաշտի  մասին «Հետքի» հարցմանը  հուլիսի 4-ին Շնող համայնքի ավագանու անդամ Գեղամ Պետրոսյանը պատասխանեց. «Իրանց հարցրեք էլի, ես տեղյակ չեմ: Այդ հարցով չեմ զբաղվել»:   Ավագանի Պետրոսյանը տեղյակ չէր նաև ֆուտբոլի դաշտի վերանորոգման համար  համայնքի բյուջեից ծախսված գումարներին. «Ես չեմ հիշում, ուղղակի չեմ հետաքրքրվել այդ հարցով»,- ասաց  նա: Դաշտի վերանորոգման համար  հատկացված գումարի մասին «Հետքը» հարցումներ արեց նաև Շնողի գյուղապետարանի հաշվապահ Սվետլանա Ջաղինյանին: 

Վերջինս սկզբում ասաց, որ դաշտում կատարվել է նախատեսված աշխատանքների 70 տոկոսը: Երբ հաշվապահին հիշեցրինք, որ դաշտում կատարված է ընդամենը   տարածքի ցանցապատման աշխատանքներ, նա ասաց. «Այդ գումարները նախահաշվային և կատարողական ակտերի համաձայն վճարված են, մնացածի մասին  հարցրեք գյուղապետին, ես տեղյակ չեմ»:

Հիշեցնենք, որ Հայկազ Քոչինյանի կողմից համայնքի բյուջեի այլ անարդյունավետ ծախսումների մասին  «Հետքը» ահազանգել է դեռ  2010թ.-ի սեպտեմբերիին «Դուք դատախազության աշխատող չեք, որ Ձեր  հարցերին պատասխանեմ»,- լրագրողին ասում է գյուղապետը» հրապարակմամբ:

Հոդվածի  հետ կապված մեր հարցմանը  Լոռու մարզի դատախազ Կարեն Շահբազյանը  2011թ.-ի օգոստոսի 11-ին «Հետքին» տված իր հարցազրույցում պատասխանել է. «Սա նույնպես այն դեպքերից է, որ փորձաքննության պատճառով, հոդվածի փաստերի հետ կապված գործը դեռ ընթացքի մեջ է»:  Ոստիկանության Ալավերդու քննչական բաժանմունքի պետ, ոստիկանության փոխգնդապետ Ռուդոլֆ Ստեփանյանը այսօր «Հետքին» տեղեկացրեց, որ վերոնշյալ հոդվածի հետ կապված` երկու տարի հետո, Հայկազ Քոչինյանի դեմ քրեական գործ է հարուցված, ընթանում է նախաքննություն:

Ու մինչ երկու տարուց հետո էլ նախաքննությունն ընթանա, շնողնեցիները այդ ընթացքում էլ զրկված են մնում ֆուտբոլի դաշտը օգտագործելու հնարավորությունից: Ֆոտբոլի  անբարեկարգ դաշտը  ներկայումս գտնվում է Շնողի կովերի իշխանության տիրույթում: Այն դարձել է արոտավայր: